謝連忠：點解業主寧願凋空個舖，都唔出租？

2025年3月18日

面書帖文

按：作者是香港「葉謝鄧律師行」創辦人之一。

問號：點解業主寧願凋空個舖，都唔出租？有人說是怕影響銀行估值，會call loan。但其實，好多舖都冇按，根本冇此問題。我試過找代理睇舖，你會發現，放盤出售的舖，不多，原因：根本不會放售。問題：舖價跌，為乜唔賣？答案：阿爺剩落，好平買，已回本。問題：揸現金好過舖價再跌。答案：我大把現金，不缺錢生活。

問題：都係唔明。答案：因為你是用自己的邏輯。

一、這些業主不缺錢生活，沒有舗租，他們仍有充足收入，充足現金，不要成日以為人家是二世祖，靠租金生活。有生意的人，有投資的人，大有人在。有錢人，後代是專業人士特別多，因為有錢人，一定給仔女最好的教育，不是富二代就一定遊手好閒同敗家，不是老豆有錢，個仔就一定係無用廢柴。就算係廢，也不一定敗家。

二、因為原因一，他們不著緊。

三、有錢人好怕煩。市道差，放租是一件麻煩的事。市道好，租客沒要求，搶住租。現在市道差，租客要求多多，長免租期，租金斬半，拖租要追租，又要找律師收樓。業主不是缺錢，又怕煩，寧願不租出，可以安靜生活。

四、一般人只有一間自住樓，不會明。有樓收租，也只是多一間，仍欠銀行錢，要供樓，所以很緊張有租收。但當你有很多錢，利息多過生活需要，你不會介意收入少一些，那只是佔你的十分一或更少。

五、d舖一定有按，息噉低，按咗放定期收息仲著數。錯！大把舖冇欠銀行錢。賺息差？有錢的人，有賺盡一分一毫的，但也有對蠅頭小利冇興趣的，身家大把，做乜搞噉多？仲有，向銀行借錢，係件煩事，壓力測試、稅單、擔保人，又話估唔到價借唔足，呢樣嗰樣，當你好有錢，你就討厭人家當你係窮人，左度右度。

【網友討論】

Stonic Donjuan Chu

大部份業主心態，都係觀望，好似股票輸咗唔賣住一樣，等個市回升。 但都要睇自身能力嘅。炒媽展梗係迫住賣啦。買長嘅咪當遇大嘅波副，拉返勻都係細數，升返上去就乜都返嚟。其實有個舖出租嘅人大部份都係富人，或係家族資產，或者係上市公司，思維方式都會比較有高度同寬度，加上有啲實力，睇正啲再算係一般心態，低價都唔肯租係可能怕違約率高怕俾人拖住嫌麻煩，到時有好客都租唔出仲衰。再者，市道肅條，成買家佔主局，好多有錢佬唔鐘意啲俾人烚嘅感覺。

Gigichibaby Laurel

同意

見過有好多舖及資產的老人，人到老年，生活簡單，人不太追求物質生活，相處到開心就租俾你，麻煩就寧願唔租。有錢人不緊張一百幾十萬不用計到盡，衣住夠一世甚至下兩代人，收租是閒錢不是生活費。計到盡的大多數是一般中產及手停口停的人。