【文革50年】不想歷史淹沒 收藏紅書的人—彭志銘
《蘋果日報》即時新聞，文革50年系列，2016年5月28日
次文化堂社長彭志銘收藏了上千本文化大革命紅書，最近添多近百本，都是在一個舊書拍賣會上以底價購入，無人競投，包括素來無寶不落的內地炒家，「佢哋覺得 炒唔起」，市場沒老細想要，「可能佢哋憎恨文革，唔想有痛苦回憶」。他也討厭老毛，但人棄我取，因為這批遺物見證了一個泯滅人性的時代，不容毀滅、篡改，「白紙黑字印出嚟，呢種文獻就係實況」。
舊書拍賣會在5月初舉行，適逢文革50年，一批紅書趁勢拍賣，包括22冊毛澤東思想紅書及27冊紅歌書，屬早期袋裝書，是文革時重要的宣傳品，「我哋預咗畀人搶，居然一份都冇人要」。彭志銘當日任拍賣會主持，也大感意外，「可能佢哋本身好討厭文革，對文革心底有條刺、有陰影，唔想保留任何同文革有關嘅傷痕」。
「每個共產黨員都應懂得這個真理：『槍桿子裏面出政權』」（《毛主席語錄歌曲集》）
拍賣會後彭志銘以底價購入近百本紅書，當中收錄了由毛主席語錄譜曲而成的紅歌，編者明言：「運用各種文藝形式宣傳偉大的毛澤東思想，這是革命文藝的根本任 務」。套用今天話語，即洗腦教育，「日日洗你腦，等你唱歌都要識」。彭志銘最感興趣是一書5卷的《毛澤東選集》，1964年開始印刷，首4卷都是直排正體字，「係傳統嘅華夏文化」。
惟獨1974年出版的最後一卷，改用橫排簡體字，那時文革早已釀成浩劫，「即係話呢個中國已經變咗，變到冇得好救，中國嘅文化已經毀滅晒，證明一個時代嘅結束」。
「千忙萬忙，階級鬥爭不能忘；千要緊萬要緊，革命到底最要緊。」（《毛澤東思想照紅了我們的心》）
文革時彭志銘念小學。第一次接觸的中共刊物是《人民畫報》，左派工會派給他父親，畫報常刊登內地圖片，他曾引以為傲，「依家睇番好多都造假，話大豐收，其實係十幾條村加埋嘅收成」。一家十口住在旺角廣東道唐二樓，六七暴動戒嚴，街上放催淚彈，樓上也遭殃，「我哋做𡃁仔唔識死，喺窗口『裝一裝』，警察照到即刻嗌上嚟，爸爸媽媽好驚，喺後面扯走我哋」。
文革10年，每隔一段時間，他都要跟陌生人同床。父親在油麻地賣魚，每次收到電話，就放下工作， 借錢去流浮山、沙頭角接濟偷渡者，大多是鄉里的兒子，部份人更不相識，「因為冇希望、冇得食，個個都想離開大陸」。200呎套房住上10多人，供食供住， 父親又介紹工作，「我就最慘，一嚟到冇地方瞓就瞓我張床，一張床瞓3個人」。
彭志銘記得，當時有一種說法，只要一個人能走出去，這家人就有希望，「生活過得好，就有錢寄返去」；但吊詭的是，部份投奔怒海的人，後來趁改革開放，重返內地設廠，賺得盤滿砵滿。當年投靠父親的年輕人，現已步入古稀之年，仍心存感激。他說父親離世時，有鄉里給了5萬元帛金，這是心意，更是一份情義。
「至聖先師，最高的聖人和老師，這是歷代反動階級對孔丘的無耻吹棒。」（《孔孟之道名詞簡釋》）
自小是收集狂，彭志銘80年代開始有系統地收藏文革遺物，由舊書畫冊到毛語錄，純粹興趣，直至涉足文化出版，才知如獲至寶，「其實我哋依家所見到嘅，有紀錄嘅，白紙黑字印出嚟，呢種文獻就係實況」。早前他在工廈收集了大批文革刊物，估計是一名老左派棄掉，包括一本批林（林彪）批孔（孔子）運動期間出版的《孔孟之道名詞簡釋》。
這書辱稱孔子做孔老二，把他提倡的克己復禮歪曲為「復辟奴隸制度的反動綱領」；聖賢先師的尊稱更貶成「是歷代反動階級對孔丘的無耻吹棒」。《秦始皇》一書則視焚書伉儒為「鎮壓奴隸主復辟的一場革命」；並暗喻毛澤東是統一中國的皇帝。
那是顛覆歷史、妖惑人心的年代。「如果唔係有呢啲嘢（文獻），我哋睇唔番。呢種歷史係會淹沒咗。共產黨就係要掃除晒所有歷史，破壞所有文物」。彭志銘說，近年有很多內地人大批購入香港出版的舊書，由周白蘋《中國殺人狂》到依達的小說和董橋的散文，搶走了香港的文化，壟斷文獻實物的話語權。
「你大陸佬識，我彭志銘都會識。我都會擸番我哋香港人對你文革、對你六七暴動嘅話語權，喺番晒呢啲文獻度」。文革過了半世紀，彭志銘仍字字鏗鏘，「唔係由我講，裏面（文獻）會話番晒出嚟」。
沒有留言:
發佈留言