鄭立：金融中心與殖民地經濟 (粵文)

鄭立：金融中心與殖民地經濟

面書帖文，2023年11月6日

乜野係金融中心呢？或者，乜野係金融業呢？

老套講句，金融業就係錢滾錢，「你有錢就會賺錢」既行業。先唔講各種比較複雜既金融工具，我用最簡單既「利息」去解釋，金融業就係收息，只要呢個世界有生利息既野比你買，有固定息既錢比你借，你就可以做到利差交易。融資到幾多賺幾多。

香港成個上層經濟就係咁運作，最大化香港融資既能力(即係借錢)，然後借最多既錢，然後投資落息比貸款利息高既野，就可以無中生有咁賺錢。

咁點樣可以借最多錢呢？就係信用額，即係人地願意借幾多錢比你，你借錢要靠抵押品即係資產，簡單講即係物業，物業估值越高借錢越多，代表你用借錢得返黎既套利交易利潤亦越高。

咁物業既估值又點根據咩？根據收益率，即係租金。所以香港要貴租先做到金融中心，貴租既話，估值升，融資能力變強，圈到較大既錢就可以有更大既套利交易利潤。

你將香港當成一個卡牌遊戲，咁香港就係一副最大化融資能力既 deck，每一張牌，從強積金，租金，自由行，都係為左令圈錢能力最大化的。而前題就係呢二十年，因為低息，導致左錢滾錢遊戲係最大利潤既行為。

至於你個生意做唔做到，你班契弟生活點，住劏房，通漲，食咩兩餸飯，呢個叫下層經濟。下層經濟既運作目標得一個：就係運作到。你六千蚊租個床位，重點係佢運作到，有人肯租六千蚊個床位就得，理得佢係大陸人南亞人定香港人，你租唔起係你問題。你間餐廳難食又貴又蝕住做都無問題，佢定期有交租就得。

(編按：兩餸飯，香港平民餐點，早於二千年代出現。除基本米飯，客人通常在十項餸菜中自選二至三款。全部由中央廚房預製再送往商鋪，油鹽糖偏多，食材成本低。武漢肺炎後全球經濟不景，兩餸飯大受歡迎，成為城中熱話)

你當你係屠房隻豬，無人想理你點樣比人劏，有幾污糟，幾唔人道，全部唔重要，最重要係最後有一條條豬肉可以運出黎，過程無人想理。你班下層市民日日互相斬人，日日哭崩長城，做十六個鐘住鼠籠，無人想知，總之你交到租理得你生癌死。

所以最理想係連鎖店，連鎖店係咪賺錢呢？唔重要，重點係連鎖集團只要唔成個崩潰，佢地有份參與呢個滾錢遊戲，自然就會有錢交租，連鎖集團既存在就係為左交租，哪怕係唔賺錢甚至蝕錢，因為掌握連鎖集團既上層經濟可以供血。

佢可以維持租值唔使死。間鋪蝕錢唔重要，只要佢維持到個租，個租又可以令估值維持，估值維持令錢滾錢，咁長期蝕租都無問題。因為佢可以係第二個賺返，簡單講，你買個開心樂園餐，都識丟左個薯條淨係要舊玩具，對於財團黎講，佢地有辦法維持到金融既利潤，佢個開心樂園餐丟落海一樣無問題。

你d小店對佢地黎講，只係一個不確定性，會突然執笠突然做唔到或者拖租，不如我自己用返我自己控制到既連鎖店租返，保證個租金穩定，個遊戲仲易玩。死晒都唔可惜。

香港好似好文明，實際上呢二十年，經濟結構同某d非洲國家越黎越接近，就係走向高 GDP 貧窮。數字越撐越高，但生活越來越苦。因為佢個實體經濟對於上層根本唔重要。

咁咪即係歇澤而漁，殺雞取卵，最後會有報應？用卡牌遊戲呢事齋，就係d牌長期全部變負數。

係呀，不過如果你加埋最後一張牌「賺夠錢就投資移民去外國退休」，咁所有負數都唔關上層事，負數會被全部棄牌，棄比基層既各位。點解殖民主義咁大問題？

殖民主義既問題就係形成一種咁既經濟，最後受益者(即係買辦)全部離開殖民地。然後得到了它了。香港係唔係殖民地可以拗，但香港係殖民地經濟就好明顯。